عمران خان کی سابقہ ساس لیڈی اینابیل گولڈ اسمتھ انتقال کر گئیں

پاکستان تحریک انصاف (پی ٹی آئی) کے بانی عمران خان کی سابق ساس اور جمائما گولڈ اسمتھ کی والدہ لیڈی اینابیل گولڈ اسمتھ 91 برس کی عمر میں انتقال کر گئیں

برطانوی میڈیا کے مطابق لیڈی اینابیل 11 جون 1934 کو لندن میں پیدا ہوئیں اور برطانوی اشرافیہ اور سماجی حلقوں میں نمایاں مقام رکھتی تھیں۔

لیڈی اینابیل گولڈ اسمتھ کے چھ بچے تھے، جن میں جمائما گولڈ اسمتھ کے علاوہ معروف برطانوی سیاست دان اور سابق رکن پارلیمنٹ زیک گولڈ اسمتھ بھی شامل ہیں۔

رپورٹس کے مطابق لیڈی اینابیل کے دو بیٹے مختلف سانحات میں جاں بحق ہوئے — ایک مغربی افریقہ میں انتقال کر گیا جبکہ دوسرا شیر کے حملے میں ہلاک ہوا۔

ان کے شوہر سر جیمز گولڈ اسمتھ نے اپنی اہلیہ کے نام پر لندن کے علاقے مے فئیر میں مشہور نائٹ کلب “اینا بیلز” قائم کیا تھا، جو برطانوی شاہی خاندان اور اشرافیہ کا پسندیدہ مقام سمجھا جاتا تھا۔

لیڈی اینابیل نے محض 15 سال کی عمر میں “لیڈی” کا خطاب حاصل کیا۔ ان کی پہلی شادی مارک برلے سے ہوئی جو 21 سال تک قائم رہی، بعد ازاں 1978 میں انہوں نے سر جیمز گولڈ اسمتھ سے دوسری شادی کی۔

ان کے بیٹے زیک گولڈ اسمتھ برطانوی ہاؤس آف لارڈز کے رکن رہے اور 2016 میں انہوں نے میئر لندن کے انتخاب میں صادق خان کے خلاف حصہ لیا تھا۔

یاد رہے کہ لیڈی اینابیل کی بیٹی جمائما گولڈ اسمتھ نے 1995 میں عمران خان سے شادی کی تھی جو 2004 میں طلاق پر ختم ہوئی۔

لیڈی اینابیل کے انتقال پر برطانیہ کے سماجی و سیاسی حلقوں میں گہرے دکھ اور افسوس کا اظہار کیا جا رہا ہے۔ انہیں ایک بااثر، خوش گفتار اور شائستہ شخصیت کے طور پر یاد کیا جا رہا ہے۔