طلبا و اساتذہ کا اغوا،صدرنےایمرجنسی نافذکر دی

ابوجا: نائیجیریا میں گزشتہ ہفتے کے دوران متعدد شہری، خصوصاً سکول کے بچے اور اساتذہ اغوا ہونے کے بعد صدر بولا ٹینوبو نے ملک میں قومی سیکیورٹی ایمرجنسی نافذ کرنے کا اعلان کیا۔

عرب میڈیا کے مطابق صدر ٹینوبو نے کہا کہ یہ ایک قومی ہنگامی صورتحال ہے اور سیکیورٹی کے چیلنجز کا مقابلہ کرنے کے لیے اضافی اہلکار فوری طور پر تعینات کیے جا رہے ہیں۔

گزشتہ ہفتے کے دوران ملک کے مختلف شہروں اور دیہاتوں سے بچوں اور عملے کو اغوا کیا گیا، جن میں سے کچھ کو ریسکیو کر لیا گیا جبکہ کچھ خود فرار ہونے میں کامیاب ہوئے۔ تاہم، نائجر اسٹیٹ کے کیتھولک بورڈنگ اسکول سے اغوا کیے گئے 265 بچے اور اساتذہ تاحال لاپتہ ہیں۔

صدر ٹینوبو نے ہنگامی صورتحال کے پیش نظر مسلح افواج میں نئی بھرتیوں کا حکم دیا اور کہا کہ سیکیورٹی بحران سے نمٹنے کے لیے مزید فوجی اور پولیس اہلکار زمینی سطح پر تعینات کیے جائیں گے۔

حکومت نے متاثرہ علاقوں میں سرچ اور ریسکیو آپریشنز کے دائرے کو بڑھانے کا بھی اعلان کیا ہے تاکہ مغویوں کو جلد از جلد بازیاب کرایا جا سکے۔